ايملا بيرليگينه دوغرو

ان ياخشي يازي قايداسي ،بيرليکده يازديغيميز قايدادير

                                                                                                             نويد محمدی

سسلري يازيدا حرفلرله گؤسترلر . سسلري ائشيديريک وتلفّوظ ائديريک ، آما حرفلري گؤروروک و يازيريق. تورک ديلي تاريخ بويو موختليف اليفبالاردا يازيليب .گؤي تورک اليفباسيندان باشلاياراق ،سونرا اويغور اليفباسي مئيدانا گليب. اورخون يئني سئي آبيده لري گؤي تورک و يوسف خاص حاجبين قوتادغو بيليغ اثري اويغور اليفباسيندان قالان ياديگارلاديرلار.

تورکلر ايسلام دينينه اينانديقدان بري ،کؤنوللو اولاراق اؤز يازيلارين قورآن اليفباسي اولان عرب اليفباسيندا يازماغا باشلاييرلار .باشقا موسلمان ميلّت لرده همين ايشي گؤرورلر و ايسلام دونياسينين اورتاق مدنيتي همين واسيطه ايله  يارانير.

19-نجو عصره قدر همين اورتاق اليفبا بوتون تورکلر آراسيندا ايستيفاده اولونوردو . آما همين زماندان اليفبا آيريليقلاري باشلايير کي بو ايشين سبب لرين بئله بيان ائتمک اولار:

1-تورک ديلينين 9 سسلي حرفي اولدوغو اوچون اونوعرب اليفباسيندا يازيب اوخوماق چتين اولور . اليفبا مسئله لرينين مونتقيدلرينين باشچي‌سي ميرزه فتحعلي آخوند اف اولاراق ايللر بويو چوخلاري او جومله دن کسروي نين بو حاقدا يازيلاري اولوب . جليل محمد قلي زاده بير طنز يازيدا، باجي سينين اوشاغي اولوب(دونيايا گؤز آچيب) يوخسا اؤلوب(وفات ائديب)سهولريندن دانيشير و اليفبا چاتيشمامازليقلارينا جيدّي اينتيقاد ائدير.

2-سياسي هدف لر : ساوئت (شوروي) اراضي سينده بير چوخ تورک موسلمان ميلت لر ياشااييرديلار و بونلار هاميسي بير اليفبادا يازيب اوخويوردولار. بوندان علاوه اونلارين ساوئت دن خاريج تورک-موسلمان خالقلارلادا ايليشگي لري اولوردو . اوسته ليک اونلارين 1000 ايلدن آرتيق پارلاق ايسلامي مدنيتلري وارايدي و بو بولشئويک لري اذيت ائديردي و بونا گؤره ساوئت حاکيميتي ، روس کؤکنلي قاتما- قاريشيق کيريل اليفباسين ايبداع ائديب اوستده قئيد ائتديگيميز خطرلرين قارشيسيندا دايانيرلار.بوندان سونرا  موختليف تورک خالقلارين يالنيزجا ائللرينين اديلا آدلانديريب(مثلا اؤزبک خالقي، آذربايجان خالقي و...)اونلارين قوهوملوقلارين راحاتجاسينا اينکار ائديرلر.

بيرينجي مسئله ده سؤيله ديگيميز موشکول عرب اليفباسيندا اولان چاتيشمامازليغي و ايکينجي مسئله ده عرب اليفباسينين مزيتلرين گؤسترير.

بو گون 27 ايل دير کي ايران دا تورک ديلينده درگي لرچيخير و همين گونه قدرده دوامي اولوب . بو گون چيخان درگي لريميز اليفبا باخيميندان 3 يئره بؤلونورلر.

1-بئش ايل بوندان اوّل اورتوقرافي سميناريندا تصويب اولان قوراللارا اساسلاناراق موختليف يازيلاري چاپ ائدنلر.وارليق،ديلماج و حيدربابا و... بو گروپدان ساييليرلار.

2-اؤزلرينه بير چرچيوه تعيين ائديب بو اساسدا يازيلارين چاپ ائدنلر . بو گروپدا دا آذري و مهدآزادي و... درگي لري يئرله شيرلر.

3-ائله صحيفه لريميزده بير تورکجه مطلب ده گئتسين دئيه ديقّتسيزدرگي لر. بو درگي لر بير پايه و اساسا باغلانمادان هردن بير هاوا چاليرلار.بونلار تکجه اليفبا يوخ بعضا يازينين مضمونونا دا باخماييب و تاسوفله چوخلو گرامر،لوغت و اليفبا سهولرينه يول وئريرلر.

بئله ليکله پارام-پارچا اولماق بيزلره بؤيوک عاييب‌دير وبير ثابيت قرارلارا چاتماق بو گونوموزون ان اؤنملي ايشلريندن بيري دير.

بورادا اليفبا حاقيندا نئچه مسئله يه توخونماق ايسترديم.

٭تورک ديلينده تعليمات گئتمه ديگي اوچون هر بير اوخوجو ايلک آتديمين کيتاب و درگي لرين اوخوماسيلا باشلايير.يازيلاريميز داها اوخوناقلي اولوب و اونلاري يورمامالي دير. اگر اوخوجو، قيسا ادبي بير متنين اوخوماسيندان عاجيز قالسا و يا اونو چوخ چتين اوخورسا موطلق داها بؤيوک و جيدّي آتديملار آتماغا هوسي اولمايجاق. البته بو مسئله يه تکجه اليفبا يوخ آغير و چتين لوغت لرين متنيميزده اؤزلليکله ده غير تخصوصي يازيلاردا کي بير خاص قشرين اوخوماسي اوچون يوخ بلکه عمومون اوخونماسي اوچون يازيليب داها ديقت ائديلمه لي دير . اونوتماياق کي يازي اوخوجو اوچون يازيلير . گلين اونلار اؤزوموزدن کوسدورمه يک.

٭دئديگيميز کيمي عرب اليفباسي نين ضعفي سسلي حرفلرين گؤسترمه سينده دير.(فونتيک يازماق موشکولو) و مزيتي ديل خزينه ميزه قاتيلميش اولان عرب کلمه لرينين و اونلارين موختليف وزن لره گيريب هر هانسي سينين بير-بيريله قونشولوغون راحاتجا گؤسترمک ده دير. علم"و "تعليم""کلمه لرينين بير کؤکدن اولدوغون ايلک باخيشدا گؤرمک اولار. آنجاق فونتيک اليفبالاردا اونون تشخيصي بو قدر ده راحات اولمايير.

بيز عرب اليفباسينين بئله-بئله  ضعف لرين و گوجلرين تاپمالي و اونلارين ضعف لريندن چکينيب ،گوجلرينه آرخالانمالييق. اليفبا مسئله لريميزين ان اؤنملي سي و حقيقتا بو گونکو مؤعضليميز فارسجا و عربجه کلمه لرين يازيليشي دير. بيز کلمه لري داها فونتيک لشديرمکله اونون ضعف لرين قابارديب ،گوجلرين گيزله ديريک و بئله ليکله اؤزوموزه جفا ائديريک . البته بو دئمک دئييل کي تماما عربدن آلديغيميز سؤزلري تماميله اؤزو کيمي يازاق. بئله اولسادا بعضي نوقصانلاريميز اولاجاق.

٭کلاسيک ادبياتيميز ،اؤزلليک له ده شعر صنعتيميز کي عروض وزنلرينده يازيليب .معمولي يازيلاريميزين نئچه قاتي عرب کلمه لر داشيير. بونون سببي عروضون عرب کلمه لرينين اساسيندا دوزلمه سي دير.بيز بعضا غزلي دوز اوخوماق اچون ديليميزين آهنگ قانونون پوزوروق مثلا "لار"يئرينه "لر"له جمع باغلاييريق و يا برعکس . حتي بعضا ديليميزده ارينميش کلمه لر کي ايللر بويو ديليميزده  ايستيفاده اولدوغو اوچون تورک کلمه لرينين پالتارينا گيريب لر غزلده عيني عربجه تلفّوظ ائتمک مجبوريتينده اولوروق. بئله ليکله غزللريميزي موعاصير يازيلاريميزدان آييريب آلينميش کلمه لرينين هامي‌سين آلديغيميز کيمي يازماغيميز يئرسيز اولماز. نئجه کي لاتين اليفباسيندا يازان تورکلر ،غزلده حرفلره موختليف حرکه لر آرتيريب اونلارين دوز اوخونماسينا چاليشيرلار ،بيزده کلاسيک يازيلارميزي استثنا اولدوقلاري اوچون اونلاري فرقلي وغيرتورک سؤزجوکلري عيني آلديغيميز کيمي يازماق يئرسيز اولماياجاق.

بو مسئله لرين هر بيريسين قبول يا رد ائدنلر اولا بيلر و هئچ بيريسي موطلقا يازيميزين خئيرينه يا موطلق ضرريمينه اولمايجاق.بلکه تاثيرلري نيسبي اولاجاق. آچيق دئسک اونلارين هر بيريسين رد يا قبول ائتمه سي اليفباميزا و ديليميزه او قدر ضربه وورا بيلمز کي بو قدر دارما-داغين يازماغيميز اونا ضربه وورور. اگر گله جکده  عموم طرفيندن قبول ائديليب،يازيلان اليفبا بيزيم دوشونجه ميزين عکسينه اولسادا و اونو ديليميزين اوخوناقليغينا قارشي گؤرسک ده يئنه ان ياخشي يازي قايداسي ،بيرليکده يازديغيميز قايدا اولاجاقدير.

اورتوقرافي سميناري قرارلاريميز،بئش ايلليک سيناقدان سونرا

عليرضا صرافي

24/10/1385 تهران- وارليق اوجاغي

عزيز و دگرلي مطبوعات صاحيبلري و يازيچيلاري

وارليق، ديلماج و آذري درگيلري يازارلار هئيتي‌ آديندان ائله‌جه ده شخصيم آديمدان سيزه خوش گلدين دئيرک، چاليشاجاغام بورادا "توپلانماميزين اصل مقصدي نه‌دير؟" سوآلينا  قيساجا جواب  وئرم و سونرا زاماني ايتيرمه‌دن  جناب دوکتور هئيتدن ايسته‌يم کي ايملا مسأله‌لرينه داها گنيش توخوناراق اؤز دوشونجه و انديشه‌لريني بيزيمله پايلاشسينلار.

کئچميشده بير گله‌نک اولاراق، بيزيم وارليق، هميشه يازي ديليميز و يازي قايدالاريميزين تنظيمات ايشلري‌ايله مشغول اولموشدور.  وارليغين ايلکين نومره‌لريندن اعتيبارا دوکتور نطقي باشدا اولماقلا، يازي  قايدالاري حاقدا آرديجيل مقاله‌لر و موباحيثه‌لر  گئتميشدي،   سونرالار "املا قيلاووزو" آدلي بير موستقيلّ نشريه ده وارليق طرفيندن ياييلدي، بو قيلاووزدا دوکتور حميد نطقي چاليشميشدي او گونکو فرقلي ايملا قايدالاريميزي اطرافلي اؤيرنديکدن سونرا، ان الوئريشلي قايدالاري کشف ائديب، يازارلاريميزا اؤنري وئرسين، بو ايملا 1370 ‌-لي ايللره کيمي آذربايجان مطبوعاتي و يايينلاري ايچينده عوموميتله تطبيق اولونوردو.  رحمتليک دوکتور زهتابي و بير چوخ باشقا يازيچيلاريميز، اؤز شخصي ايملالاريندان ال گؤتوره رک، تمل داشلاريني نطقي‌ قويان ايملا قايدالاريميزي اساس اؤرنک کيمي گؤتوردولر.

او گونه کيمي دخيل کلمه‌لر هله‌ليک اورژينال ايملالاري‌ايله (فارسجا متنلرده يازيلان کيمي) يازيليردي.

***

مين اوچ‌يوز يئتميشلي ايللردن باشلاياراق بو دوروم تدريجا دگيشمگه باشلادي، يئنيجه آناديلده يازيب، اوخوماغا باشلايان گنج نسيل، عوموما ديليميزي  لاتين و کريل اليفباسيله يازيلان متنلردن اؤيرنديکلري اوچون، آراشديرمالاريندا دا، اکثر لاتين و کريل قايناقلاردان فايدالانديقلاري اوچون، ايستر-ايسته‌مز ديليميزين يازيليشينداکي دخيل کلمه‌لري بعضا لاتين قرافيکيندن  عرب قرافيکينه کؤچوره رک، هر بير لاتين حرفي‌ يئرينه، مکانيکي اولاراق، بير عربجه حرف قويوردولار، آما بو ايشده ايتي گئدنلر ده وار ايدي، آستا گئدنلر ده، بعضا بير يازيچي‌نين واحيد متني ايچينده، عيني کلمه‌لري، ايکي اوچ ايملا ايله يازيلماسيني دا گؤرمک عادي بير حاديثه کيمي قبول اولوردو.

يئتميشلي ايللرين سونلاريندا دؤولته منسوب اولان شخصلر و اورقانلاردان بئله بير رسمي موصاحيبه‌لر و اؤن‌قرارلار اورتاليقا گلدي کي تورک ديلي، مکتبلرده و اونيورسيته‌لرده تدريس اولاجاق، بو خبرلرين يانقيسي بيزي،  ايملاميزين تعجيلي اولاراق تنظيم‌لنمه‌سينه ساري يؤنلتدي. بيرينجي اورتوقرافي و ايکينجي اورتوقرافي سمينارلارينداکي اساس يؤن، ايملاميزي، يئني باشلايان فونتيکلشمه آخيني ايله آياقلاشديراراق، مکتبليلره  ايملا درسيني راحات اولسون دئيه، رسم‌الخطيميزده‌کي ايستيثنا کلمه‌لرين ساييني  آزالديب، اونو داهادا قايدالي بيچيمه سالماقدان، عيبارت ايدي.

او سميناردا توتولان يئني قرارلار آذربايجان مطبوعاتي و اينترنت دوشرگه‌لري و يازيچي، شاعيرلريميز طرفيندن عوموما تطبيق ائديلمگه باشلادي،  باخماياراق کي بير نئچه‌ حؤرمتلي يازيچي، شاعير، اوستادلاريميزدا قارشي چيخيب، اونو تنقيد آتشينه توتدولار، ، آنجاق، من دئيرديم کي بو تنقيدلر (يئرينده اولوب، اولماماغينا باخماياراق) داغينيق و بير-بيريله موتنافير اولدوغو اوچون، يئني جرياني اؤز مسيريندن چيخارماغا گوجلري چاتيشميردي.

ايندي بئش ايل آلديغيميز قرارلاردان کئچير طبيعي   بيز اؤز داخيلي قانونا اويغونلوغوموزا گؤره، بو بئش ايلده اؤلچوب، بيچمه‌لييک: هانسي قرارلاريميز تماميله يئرينه دوشوب، هامي اونلاري بگنيب و هانسي قرارلاريميز اصلا يئرينه دوشمه‌ميشدير. دئمه‌لي سون روتوشلار و ايصلاحلار لازيمدير ايملا قرارلاريميزدا.

منجه تورکجه سؤزلرين يازيليشيندا تقريبا هئچ بير چتينليگيميز يوخدور، اورادا قيسا  و کيچيک فرقلره باخماياراق، هامي بير سبک و سليقه ايله ايرلي گئدير، آنجاق دخيل کلمه‌لره گلديکجه، ايش باشقا جوردور.

من بير چوخ عاليم، يازيچي و اوخوجولاريميزلا دانيشيب، نظرلريني آلديقدان سونرا بو نتيجه‌ني الده ائتميشم کي :

دخيل کلمه‌لرده کلمه‌نين تانيش قيافتي (فارسلاردا، عربلرده يازيلديغي کيمي) چوخ دگيشيلمزسه فونتيک يازماقدان کيمسه چکينمير، ميثال اوچون دنياني، دونيا  و عالمي، عاليم  کيمي يازماق کلمه‌نين تانيش فورموندان بيزي چوخ اوزاقلاتماديغي اوچون فونتيک يازيليب، اوخونور. و کيمسه اونا قارشي دئييل.

آنجاق مهم سؤزونون موهوم  کيمي يازيلماسيني بير چوخلاري بگنمير، يازيچي بو کلمه‌ني اهميتلي، يا دا اؤنملي سؤزلريله دگيشرک، Mühüm کلمه‌سيني موهوم ائتمکدن چکينير و اونو اؤز سؤز خزينه‌سيندن قيراغا قويور.

ياخود، ثبوت سؤزونو ثوبوت کيمي يازماقدان قاچماق اوچون اونون عوضينه ايثباتلاماق، يا دا ثابيت ائتمک، کيمي ترمينلردن فايدالارنير و Subut سؤزونو ده اؤز سؤز خزينه‌سيندن چيخارير.

ايش معجزه و ادّعا کيمي کلمه‌لره گلديکده داها دا چتينلشير چونکو بو کلمه‌لرين يئرينه بير سؤز تاپا بيلمير، اونو مؤعجوزه و ايدّيعا کيمي يازماغي دا بگنمير، نتيجه ده بعضا جومله و ياخود دا اؤز مفکوره‌سيني دگيشمه‌لي اولور.

****

بو يازيچي‌نين ترجيحلري،  او کي قالدي اوخوجونون ترجيحلري:

 منجه بو آرادا  اوخوجو کوتله‌سينين داها دا اؤنملي يئري وار، بوگون بيزيم بوتون تورکلرده، آنا ديلده‌کي متنلري اوخوماق هوسي گونو-گوندن آرتير، طبيعي اوخوجو کوتله‌سي مطبوعات و کيتابلارين اوخوناقلي اولدوغونو هاميدان آرتيق ترجيح ائدير، او بير يازيني اله آليب، اوخورکن، عرب يا خود دا فارس منشاءلي کلمه‌لري ده تئز-تئز اوخويوب، کئچمک ايسته‌يير، طبيعي دخيل کلمه‌لرين تانيش فورمو، داها راحات و اوخوناقلي اولاجاق اونا. يازينين اوخونماسيندا دايانيب، دوروقسونماق ، يوروجو اولور. ايملاسي عجاييب اولان يازيلار اوخوجوسونو قاچيردار  و نتيجه‌ده اوخوجو ترجيح ائده‌جک اونون عوضينه گؤزلري آليشان فارسجا بير متني اوخوسون. 

من بير مطبوعاتچي کيمي اؤز آديمدان و ائله‌جه‌ ده ديلماج يازيچيلاري و اوخوجولاري  آديندان ايکينجي اورتوقرافي قرارلارينين  بوتون عومومي ايقبال قازانان قرارلارينين اکثريتيني تاييد ائده رک، بو بئش ايل‌ليک سيناقدان سونرا، اونون بعضي دخيل کلمه‌لرين يازيليشيندا، ساده‌لشيب، يازيليب، اوخونمالاريندا روانليق و يئيين‌ليگي تأمين ائده‌جک، سون ايصلاحلاري تکليف ائديرم.

منجه بو،  سورکلي اوخوجو کوتله‌سي و يازيچيلار هئيتي ايله اوغراشان مطبوعاتيميزين بوينونا دوشن بير وظيفه‌دير.

سؤز يوخ کي جناب دوکتور هئيت‌ين ايراندا اولماسي فورصتيني قاچيرمادان وارليق اوجاغينا توپلانيب، همين موختصر ايصلاحاتي دا يئرينه سالماق اولار. 

مني صبيرله دينله‌ديگينيز اوچون مينتدارام.

ساغ اولون