ايملا بيرليگينه دوغرو سون چاليشمالار

بير نئچه آذربايجان مطبوعاتيچيلاري و يازيچيلارينين ايستگي اساسيندا دوکتور جواد هئيت "مطبوعاتيميزدا ايملا چتينليکلري موضوعوندا بير مطبوعاتي ايجلاسا قاتيلدي.

يکشنبه گونو آخشام ساعات 5.5 دا وارليق ژورنالي‌نين دعوتي ايله ديلماج، ياشماق، حيدربابا (تبريز)، سينا (همدان) درگيلريميزين تمثيلچيلري، اؤيرنجي‌سل درگيلريميزدن آرمان و اؤيرنجي درگيلرينين و ائله‌جه ده اورميه‌دن بيليم‌يولو درنگي‌نين تمثيلچيلري وارليق اوجاغينا توپلانيب، جناب دوکتور هئيتين "مطبوعاتيميزدا ايملا چتين‌ليکلري" حاقّيندا صؤحبتلريني دينله‌ديلر. سونرا دوکتور هئيت ايله سوال-‌ جوابا کئچديلر.

ان سوندا يئني دؤور اورتوقرافي تنظيماتي ايشلرينين آپاريجيليغي "مهندس عليرضا صرافي"يه  تکليف اولدوندو.

آلينان ايلکين قرارلارا گؤره:                                  

1-     يئني ايملا تنظيماتي اوچون بير مطبوعات شوراسي قورولاجاق.

2-   بيرينجي مرحله‌ده (يئني ايملا تنظيماتيني  ايرلي آپاريب، سون قرارلاري اؤنري وئرمک مرحله‌سينده) بو شورايا،  آنجاق کئچميش اورتوقرافي سميناري قرارلاريله آياقلاشان مطبوعاتيميز قاتيلا بيلر.

3-     يئري گلديکجه باشقا  نظر صاحيبلرينين ده امکداشليقلاري و مشورتلريندن ايستيفاده اولوناجاق.

4-     مطبوعات شوراسي‌نين  دائيمي ايجلاسلارينين يئري وارليق اوجاغي اولاجاق.

5-     ايجلاسلار هله‌ليک  هر 15 گونده بير قورولاجاق.

بو ايجلاسدا ايشتيراک ائدنلر:

وارليق درگيسي طرفيندن: دوکتور جواد هئيت، دوکتور عزيز محسني، محمدرضا هئيت

بيليم يولو درنگي طرفيندن:  مهندس حميد شافعي

ديلماج درگيسي طرفيندن: مهندس عليرضا صرافي

ياشماق درگيسي طرفيندن : سعيد موغانلي و صابر وطنخواه

حيدربابا هفته‌ليگي و آرمان اؤيرنجيسل درگيسي طرفيندن: نويد محمدي

سينا هفته‌ليگي طرفيندن: محمد شريفي

اؤيرنجي درگيسي طرفيندن: مهندس بهروز محبوبي

قئيد ائتمک لازيمدير کي آشاغيداکي مطبوعاتدان دا همين ايجلاسا قاتيلماغا دعوت اولموشدور، اونلارين اکثريتي مسئله‌يه موثبت ياناشاراق، واقت دارليغينا گؤره، بو درگيلرين ده تمثيلچيلري دوکتور هئيتين قوردوغو مطبوعاتي ايجلاسا قاتيلا بيلمه‌ديلر: آذري، يارپاق، عصر آزادي، خداآفرين، ارمغان آذربايجان، فرداي ما، صداي آذربايجان، آواي اردبيل، آراز ، بهار زنجان

سؤز يوخ کي گله‌جک نؤوبتي ايجلاسلاردا قاتيلمالاري گؤزله‌نيلير