دوکتور جواد هيئت جنابلارينين "مطبوعاتيميزدا ايملا چتينليکلري " ايجلاسيندا دانيشيقلاري

عزيز دوستلاريم و همكارلاريم

اؤنجه هامينيزا خوش گلدين دئييرم. سيزلري بو سويوق هاوادا بورايا دعوت ائتمگيمين سببي سيزلرله ياخيندان گؤروشمكله ياناشي سون ايللرده اؤنوموزه چيخان و بيزي ناراحات ائدن بير مسأله ني سيزينله اورتايا قويماق و مصلحت لشمكدير. بو مسأله بيزيم ايملا و يا اورتوقرافي مسأله ميزدير. بيز 28 ايلدن بري يعني وارليق درگيسيني چيخاراندان بري عرب اليفباسي نين آنا ديليميزي يازماغا يئترلي اولماديغيني نظره آلاراق بو اليفبايا بعضي دياكريتيك علامتلر علاوه ائديب مقاله و مطلبلريميزي باسماغا باشلاديق. او زامان رحمتليك دوكتور نطقي بو ساحه ده بؤيوك تجروبه صاحيبي اولدوغو اوچون اونون بير نئچه صلاحيت صاحيبي دوستلاريميزلا مصلحتلشه رك تكليف ائله ديگي اليفباني قبول ائتديك. ايللر سونرا دوكتور نطقي نين ده اون گوردويو كيمي اليفبادا بعضي ايصلاحات آپارماق اوچون بيرينجي و ايكينجي اليفبا سمينارلاريني برپا ائده رك اليفبادا بعضي ايصلاحات آپارديق.

 بيز اوزون ايللر ياد كلمه لري ديليميزه گيرميش و خالقين مالي اولموش سؤزلردن باشقا ديگر ياد سؤزلريني فارس قارداشلاريميز كيمي اصلي (اوريژينال) يعني عرب ايملاسيلا يازميشيق. سون اليفبا سميناريندا بعضي دوستلارين تكليفي ايله هامي ياد سؤزلرين فونتيك يازيلماسيني ايشتيراكچيلارين اكثريتي قبول ائتدي. بو سميناردا اليفبا مسأله سينده بؤيوك تجروبه صاحيبي اولان رحمتليك دوكتور نطقي يوخ ايدي. من ده اكثريتين رأيينه حؤرمت گؤسترمك اوچون قبول ائتديم. آنجاق او گوندن قاريشيقليق باشلادي و يئني ايملا هركس طرفيندن تطبيق ائديلمه دي. بير چوخ يازيچيلاريميز اسكيدن قبول و عادت ائله ديگيميز ايملا ايله يازديلار و حتي منه و وارليغا بير چوخ اعتيراض مكتوبلاري گلدي و ايملاميزدا بير هرج و مرج ياراندي. من بو دورومو گؤرندن سونرا بير چوخ قلم صاحيبلريميزله دانيشديم. اكثريتين بو وضعيتدن ناراضي قاليب بوندان اوّل كي ايملاميزا قاييتماغيميزي ايصرارلا ايسته ديكلريني گؤردوم. اونون اوچون سيزلري يعني مطبوعات اورقانلاريميزين نوماينده لريني بورايا دعوت ائتديم كي، سيزلرله بو پروبلملري اورتايا قويام. منيم موسافير اولوب يئريميزين ده دار اولدوغوندان هله ليك ديگر صلاحيتلي قلم صاحيبلريندن دعوت اولونمادي. فقط امينم كي، مطبوعاتيميز اونلارين دا نظرينه چاتديراجاقلار. انشاالله گله جكده بو باره ده گؤروشوب دانيشماق مومكون اولاجاقدير. هله ليك اونلاردان عذر ايسته ييرم.

بيز دوغما سؤزلريميزي فونتيك يازماغا آليشميش دورومداييق. آنجاق ياد سوزلرين ايملاسي بيزلره موشكول ياراتماقدادير. بو سؤزلري اوچ شكيلده يازماق مومكوندور:

1. بوتون ياد سؤزلري اؤزلليكله عرب سؤزلريني فارسلار كيمي عرب ايملاسيلا يازماق.
2. هامي ياد سوزلريني تورك سؤزلري كيمي فونتيك يازماق. بو متودو بئش ايلدن بري تجروبه ائتديك و نتيجه ده بوگونكو پروبلملر و هرج و مرجليك قارشيميزا چيخدي. چونكو اكثريت طرفيندن قبول ائديلميشسه ده هامي طرفيندن تطبيق ائديلمه دي.
3. سئچمك متودو. ياد سؤزلرين بعضيسي ديليميزه گيرندن سونرا خالقين طرفيندن منيمسنميش و خالقين مالي اولموشدور. بونلاري بير سؤزلوكله تثبيت ائديب، تورك سؤزلري كيمي تلفّوظ اولوندوغو كيمي فونتيك يازاق. ديگر بوتون ياد سوزلريني عربلرين و فارسلارين يازديغي كيمي اصلي ايملادا يازماق.

من شخصا اوچونجو متودون طرفداري يام و بونون تطبيقي و بير سؤزلوك حاضيرلانماسي اوچون بير كوميته نين قورولماسينا طرفدارام. ايرليده كوميته نين حاضيرلاديغي سؤزلويو و بو متودو بير سميناردا آرايا قوياجاغيميزي اومود ائديرم.

عزيز دوستلار؛

      28 ايلدن بري آناديليميزده قزئت، درگي و كيتاب چيخارديغيميز حالدا هله ده بير واحيد ايملايا صاحيب اولماماغيميز بيزيم اوچون عيب دير. فارسلارين دئديگي كيمي تكرو لوغو بوراخيب بيرليگه گئدك. چونكو گوج بيرليكده دير و موفقيت ده بيرليكده دير.

ساغ اولون